تارت التفاح

موضوع: تارت التفاح الثلاثاء أغسطس 12, 2014 7:11 pm

السلام عليكم
اقدم لكم تارت التفاح الشهي
تفضلوا:
تارت التفاح

العجينة:

250 غرام طحين
120 غرام زبدة تكون باردة ومتماسكة مش دايبة
75-80 ملم ماء بارد جدا
نصف معلقة صغيرة ملح
معلقة صغيرة سكر
برش نصف ليمونة

حشوة التفاح:

½ 3 تفاحة
30 غرام زبدة
3 فناجين سكر
معلقتين كبار نشا
رشة ملح
معلقة صغيرة قرفة
نص كاسة زبيب
نص كاسة جوز ناعم
معلقة صغيرة فانيلا

الطريقة:
اول شي بتعملي العجينة، بتعجني الزبدة والطحين مع بعض لحتى يصيرو زي الفتات وبعدين بتجيبي كاسة المي وبتدوبي فيها الملح والسكر وبتحطيها على جنب، بتجيبي برش الليمون وبتحطيه فوق الطحين والزبدة، وبعدين بتفتحي فتحة بنص خليط الطحين وبتحطي المي جوات الحفرة وبتصيري تجمعي الطحين والمي سوا لحتى تصير العجينة (ملاحظة: لازم ما تعجنيها، لازم تفركي الطحين والمي سوا لحتى يصيرو زي العجينة، مافي داعي تعجنيها، اذا نعجنت بتخرب). وبعدين بتحطيها بالبراد اقل شي لازم تبقى بالبراد 5 ساعات او ليلة كاملة احسن.

الحشوة: بتقطعي التفاح شرائح صغيرة بالطنجرة اللي بدك تطبخي فيها وانت عم بتقطعي التفاح اعصري عليهن نص ليمونة لحتى ما يسود التفاح وبعدين قطعي باقي التفاح وحطي فوقن 3 فناجين سكر و30 غ زبدة ومعلقتين النشا، وقلبي فيهن لحتى يدوب السكر والزبدة ويطرا التفاح بعدين طفي النار عليهن، وبعد ما تتطفي النار حطي فوق الخلطة القرفة والزبيب والجوز والفانيلا واخلطيهن سوا لحتى يتجانس المزيج وحطيه على جنب لحتى يبرد.

عبيل ما تبرد الحشوية اعجني العجينة (يفضل انك تطلعي العجينة من البراد قبل ما تعملي الحشوة مشان الزبدة بتخلي العجينة قاسية لما تبرد، بس اذا طلعتيها قبل بوقت بتطرا العجينة وبتصير اسهل للفرد) هلأ اعجني العجينة وخلي سمكها شي 1 سنتم وحطيها فوق الصينية وزبطي حوافها مزبوط.

بعدين حطي الحشوة فوق الصينية ووزعي فوق الحشوة قطع زبدة مشان تصر اطيب وبعدين حطي فوقا باقي العجينة اللي بتقطعيها بالطول، قبل ما تدخليها الفرن لازم تدهنيها بصفار البيض لحتى يعطي اللون البني، بتجيبي صفار البيض وبتخلطيه مع شوية سكر وشوية فانيلا وبتجيبي الفرشاة تبعت الدهن وبتدهني فيها العجينة من فوق وبترشي رشة سكر بالآخر على كل التارت، وبتحطيها بالفرن السخن على درجة حرارة 200 مئوية ولمدة 35 دقيقة.

وبالهنا والشفا

على فكرة انا اخذت الطريقة من الرائعة حورية المطبخ اللي بتطلع على قناة فتافيت
((منقول))

إن شاء الله تعجبكم

» مربعات التفاح واللوز
» تارت الشوكلا مع التوت
» تارت الفريز
» تارت العنب
» تارت الكرز